الـتــــــــــــــــطرف
منذ 2011-04-28
ما السلفيين برضه مصريين، وشاربين من النيل.. طب الناس بتوع كرداسة اللي قتلوا بنتهم وابنها علشان أعلنت إسلامها مش ده تطرف برضه؟ ولا التطرف حصري للسلفي المصري؟
الصحفي المحترم: عمر طاهر
تحية طيبة وبعد............،
لعلك تتفق معي أن التطرف هو مجاوزة الحد في أي شيء وفي كل شيء،
والتجاوز في التعبير والانفعال والتبني، سواء كان تطرفا دينيا أو
كرويا أو إجراميا أو بلطجيا.
ولعلك تتفق معي أيضا أن التطرف ليس له دين أو ملة، ولا يفرق في
سلوكه بين أتباع الديانات.
هل اتفقنا ....؟ الحمد لله نبدأ نتكلم ....؟ ماشي يا عم !
تم وصم السلفيين بأنهم متطرفون، ووجهت لهم أصابع الاتهام بقطع الأذن، وهدم الكنائس، وهدم الأضرحة، وتشويه غير المحجبات بماء النار، ورفع أسعار الطماطم، وزيادة درجات الحرارة، وخرم الأوزون، ودودة القطن، وموجات التسونامى في اليابان، وحرق صينية البطاطس في الفرن، وضياع مصروف أخي الصغير وهو رايح المدرسة، ومع إن كل حاجة دلوقتي بتتصور حتى قبل ما تحصل، ورغم كده مفيش فيديو واحد يوحد ربنا متصور فيه السلفيين حلوين كده وهما بيخرومو الأوزون ولا بيقطعوا ودن الراجل الغلبان أو وهما بيرفعوا سعر البتنجان، والله دي حاجة إيه....... جنان!
طب فين النيابة، والجيش، والشرطة، والشعب، والإيد الواحدة ؟ ولا إيد واحدة متسقفش ؟
عايزين التوسط في التقييم، والنقد!
ما السلفيين برضه مصريين، وشاربين من النيل.. طب الناس بتوع
كرداسة اللي قتلوا بنتهم وابنها علشان أعلنت إسلامها مش ده تطرف
برضه؟
ولا التطرف حصري للسلفي المصري؟
عايزين العدل اللي نادت به ثورة 25 يناير، عايزين النظر بكلتا
العينين مش عين واحدة مش شايفة غير السلفيين، والحط على السلفيين،
وإلا كده يبقى تطرف، وفرض للرأي، و فرض للأخبار، ولا إيه رأيك؟
وكمان الناس الزعلانة لتحرك الشيخ محمد حسان في قرية صول وفي قنا... هو مش مصري؟ ولا جنسية تانية ولا إية؟ أرجو الإفادة !
أي مصري يقدر يعمل حاجة يخدم بيها البلد يعملها ويبقى مشكور، سواء كان سلفي ....... خلفي ....... حنفي.. !
المهم إنه مصري مش دي المواطنة ولا إيه يا إخواننا؟
واللي يصادر على سعي أي مصري بيحاول يخدم البلد بدون وجه اعتراض مقبول يبقى إيه يا ولاد ؟
إسلام العطار
واحـــد بيحــب البلد
المصدر: خاص بموقع طريق الإسلام
- التصنيف: